24වන සූර්ය චක්‍රය ආරම්භ වීමත් සමඟම සූර්ය ලප තව තවත් දැකගැනීමට හැකි වෙතැයි අපේක්ෂා කල හැක. පෙබරවාරි 14වන දින අමාවක සඳ වන අතර 28වන දින පුර සඳ යි.

මාසය මුලදී බුධ ග්‍රහයා සූර්ය උදාවට පෙර නැගෙනහිර අහසේ දැකගත හැකිය. නමුත් මාසය අගදී බුධ ග්‍රහයා සූර්යයා වෙත ක්‍රමයෙන් සමීප වේ. මේ නිසා දැකගැනීමට අපහසු ය.

සිකුරු ග්‍රහයා මාසය මුලදී කිසිසේත්ම දැකගත නොහැකි නමුත් මාසය අග වන විටදී හිරු බැස ගිය පසුව ක්ෂිතිජයට ඉතාමත්ම ආසන්නව දැකගත හැකි ය. මේ අතර සිකුරු සහ බුධ යන ග්‍රහයන් දෙදෙනාම මේ මාසය තුල පෘථිවියට ඉතා දුරින් පිහිටයි.

පෙබරවාරි මාසයේ මැද භාගය වන තෙක් අඟහරු ග්‍රහයා පෘථිවියට ඉතා සමීපව පිහිටයි. අඟහරු ඡායාරූපගත කිරීමට ඔබ අපේක්ෂා කරන්නේ නම් මෙය වඩාත් සුදුසු කාලයකි. එහෙත් අඟහරු පෘථිවියට සමීපයෙන්ම පිහිටියේ පසුගිය ජනවාරි 29 දින යි. සූර්යයා බැස ගිය පසු නැගෙනහිර දෙසින් දැකගත හැකි අඟහරු ග්‍රහයා පසුදින හිරු නැග ඒමට ප්‍රථම බටහිරින් බැස යයි. මේ කාලය තුලදී කැන්සර් (කටක) රාශිය තුලදී අඟහරු දැකගත හැකිය.

බ්‍රහස්පති ග්‍රහයා මාසය පුරාවට හිරු සමඟම ගමනේ යෙදෙන බැවින් නිරීක්ෂණය කිරීම අපහසු ය. සෙනසුරු තවදුරට‍ත් වර්ගෝ (කන්‍ය) රාශිය පසුබිම් කරගනිමින් දර්ශණය වන අතර සෙනසුරුගේ වළලු දැන් ක්‍රමයෙන් දර්ශණය වීමට පටන්ගෙන ඇත.

ඔරායන් රාශිය අවට ගැඹුරු අහස නිරීක්ෂණයට ඔබ අදහස් කරයි නම් පෙබරවාරි සහ මාර්තු මාස ඒ සඳහා ඔබට ලැබෙන අවසන් අවස්ථාවයි. මන්ද මී ළඟ මාස කිහිපයේදී රාත්‍රි කාලයේ අහසේ අපට හසුවන්නේ තරු මඳ ප්‍රදේශයකි. එහෙත් ඔබ අහස වඩාත් පැහැදිලි ලෙස පෙනෙන පුදේශයක වාසය කරයි නම් වඩාත් හොඳින් අහස නිරීක්ෂණය කළ හැකි වනු ඇත.

Stellarium සහ Mitaka ඇසුරින් සකස් කලේ අනුරාධ ජයතිලක