සෙරස් මත ජලය බහුල වශයෙන් පැවතිය හැකි බවට දිගු කලක පටන් මතයක් පවතී. සූර්යයා වටා ඇති ග්‍රහක වළල්ල තුල ඇති එකම වාමන ග්‍රහලොව වන සෙරස් 1801දී පමණ සොයා ගැනුනි.

පසුව 2006 වසරේදී ප්ලූටෝ වාමන ග්‍රහලෝකයක් බවට ප්‍රකාශ කිරීමත් සමගම සෙරස් ද වාමන ග්‍රහලෝකයක් බවට ප්‍රකාශ විණි. මෙවැනි වාමන ග්‍රහලෝක පහක් මේ වන විට සොයාගෙන ඇත.

2007 දී ඩෝ(ව්)න් යානය අභ්‍යවකාශගත කිරීමත් සමගම මෙම කුඩා වාමන ග්‍රහලොව පිලිබදව නව බලාපොරොත්තු ඇතිවී තිබේ. ඩෝ(ව්)න් යානය 2011දී වෙස්ටා ග්‍රහකයට සහ 2015දී සෙරස් වෙතද යාමට නියමිතය. 1081දී සෙරස් සොයාගැනීමෙන් අනතුරුව මේ වනතෙක්ම අපට ලැබී ඇත්තේ හබල් දුරේක්ෂය විසින් ගන්නා ලද දුර්වල ඡායාරූප ය.

සෙරස් හි ජීවය ඇතිදැයි පරීක්ෂණ කරමින් සිටින කණ්ඩායම ප්‍රකාශ කරන්නේ එහි ජීවය ඇතිනම් එම ජීවී විශේෂ ද්‍රව මුහුදු තුල ඇති ගිණිකදු ආශ්‍රිත තාප කවුලු ආශ්‍රිතව ජීවත් විය හැකි බවයි. කෙසේ නමුත් මෙම ජලය ද්‍රව ලෙස පැවතීමට හෙ‍්තු මේ වන තෙක් ඉදිරිපත් වී නොමැත. මෙම ග්‍රහලොව ඉතා කුඩා නිසා ක්‍රියාකාරී ගිණිකදු තිබිය නොහැකි බවද කණ්ඩායම පවසයි.

සෙරස් සතුව ඉතා අඩු වියෝග ප්‍රවේගයක් ඇති නිසා ඉතා පහසුවෙන්ම සෙරස් හි සිට පෘථිවිය වෙත ජීවය එන්නට ඇතැයිද විශ්වාසයක් පවතී. කෙසේ වෙතත් මෙහි සත්‍ය සොයාගැන්මට අප තවත් වසර පහක්වත් ඉවසා සිටිය යුතුය.